Poul Thorsen: Vagula valso .

Venu kun mi tra l'Mondo,
velu sur mia ondo!
Timo kaj tedaj devoj
cedu al niaj revoj.

Maro - ĉielo
kaj juna belo
validas en ĉiu ŝtat'
de la monda vagad'

Lundo, dimanĉo, mardo
estas por ni hazardo.
Kaj se pluveto duŝas,
suno tuj seke tuŝas.

Estas la plano
fatamorgano,
validas -

Kaj se vetur' hiĉ-hika *)
ŝajnas vin tro laciga,
herbon duope venu,
nur ne la florojn premu!

Plej forta biso
estas la kiso,
validas -

Kaj se en fora ejo
mankas al vi la plejo,
"vino" por via pano
fluas el la fontano.

Nia menuo
estas la ĝuo,
validas -

Se vi mimike mutas,
baldaŭ vi kunbalbutas.
Inter la mondo-lingvoj
plej gravas propraj fingroj!

La esperanto
de la vaganto
validas -

Kaj se post tago rava
plenas la luno flava,
ŝparu al lito veni,
varmo ne ĉesas ĉe ni.

Amo - ekstazo
restas la bazo,
validas en ĉiu ŝtat'
de la monda vagad'.