Poul Thorsen: Teorio kaj praktiko

Teorio kaj praktiko
Dekdu disaj rimarkoj, pli malpli impertinentaj. Teorio alte ŝvebas kiel la rakedoj, sed praktiko lame strebas poste sur piedoj. Jen problemo: Ĉu papero povas post laboro en presejo aŭ kajero perdi je valoro? Teorie staras tio kontraŭ la logikon, sed ĉu ne la poezio pruvas la praktikon? Kaj - se vi sufiĉe konas lokan kluban vivon - ĉu ne kontaktiloj donas saman perspektivon? Mispresigo estas krimo ebla ne ripari. En praktiko estu limo kiom fuŝerari. Jes, la tuto de l' kulturo trovas sin sur sablo, ĉar postulo de' l'naturo estas - kafotablo.	(Ĉi tie iom saltas la penso, kaj espereble leviĝas la nivelo de la temo!) Ĝet-maŝinoj rapidegas pli ol eĉ la sona. Sed praktike (oni legas) falas kiel ŝtono. La kredantoj al ni diras: Iru al ĉielo! Sed praktike ne sopiras veni tuj al celo. Renaskiĝo de l' animo estas teorio. Sed ĉu vivon eĉ de cimo devas savi tio? Sekve, se vi iam trovas renaskitan pulon, zorgu bone, ke vi blovas ĝin sur proksimulon. Baldaŭ mi vikingo estos - plonĝos sen hezito, sed praktike certe restos en la varma lito. Baldaŭ mi nur teorios, sidos tre silente. Kelkaj certe opinios: Estos plej prudente.

Teorio kaj praktiko

Dekdu disaj rimarkoj,
pli malpli impertinentaj.

Teorio alte ŝvebas
kiel la rakedoj,
sed praktiko lame strebas
poste sur piedoj.

Jen problemo: Ĉu papero
povas post laboro
en presejo aŭ kajero
perdi je valoro?

Teorie staras tio
kontraŭ la logikon,
sed ĉu ne la poezio
pruvas la praktikon?

Kaj - se vi sufiĉe konas
lokan kluban vivon -
ĉu ne kontaktiloj donas
saman perspektivon?

Mispresigo estas krimo
ebla ne ripari.
En praktiko estu limo
kiom fuŝerari.

Jes, la tuto de l' kulturo
trovas sin sur sablo,
ĉar postulo de' l'naturo
estas - kafotablo.

(Ĉi tie iom saltas la penso,
kaj espereble leviĝas
la nivelo de la temo!)

Ĝet-maŝinoj rapidegas
pli ol eĉ la sona.
Sed praktike (oni legas)
falas kiel ŝtono.

La kredantoj al ni diras:
Iru al ĉielo!
Sed praktike ne sopiras
veni tuj al celo.

Renaskiĝo de l' animo
estas teorio.
Sed ĉu vivon eĉ de cimo
devas savi tio?

Sekve, se vi iam trovas
renaskitan pulon,
zorgu bone, ke vi blovas
ĝin sur proksimulon.

Baldaŭ mi vikingo estos
- plonĝos sen hezito,
sed praktike certe restos
en la varma lito.

Baldaŭ mi nur teorios,
sidos tre silente.
Kelkaj certe opinios:
Estos plej prudente.

Notoj
El: Nia Voĉo	N-ro 6-7/junio-julio 1954