Poul Thorsen:
La knabinoj en Hispanio.

(Laŭ Vilhelm Krag: Pigerne udi Spanien).

Mi volas kanti al vi kanteton
el Hispanio, la bela land',
en kiu fluas la ruĝa vino
kiel ĉe ni akvo el fontan'.
------Ĉar la knabinoj de la hispanoj
------dancadas polkon sen bridi sin,
------ĉiam sub palmoj kaj sub kaŝtanoj,
------sed ili pretas perfidi vin.

Mi trovis unu en Barcelono
kun blankaj dentoj kaj karbharar'.
Ŝi servis en la havendrinkejo
kaj vivis en la dekoka jar'.
------Ĉar la knabinoj ...

Ŝi ridis tuj, kiam mi alvenis
por drinki brandon kun limonad',
kaj en la koro tuj amdoloro
ekflamis kiel benzin-brulad'!
------Ĉar la knabinoj ...

Tuj al konsulo mi rapidegis
por iĝi edzo de l'belknabin'.
Li nur respondis: "Ho, lasu tion,
ĉar eble estas ŝi belputin'".
------Ĉar la knabinoj ...

Jes, tion diris al mi konsulo;
mi iris trista al dancobal',
sed la knabino kun la fianĉo alvenis,
dum ŝvelis mia gal'.
------Ĉar la knabinoj ...

Mi drinkis brandon kaj limonadon,
kaj proksimume post tria glas'
mi ekpuŝetis al la fianĉo
kaj plantis pugnon sub lia naz'.
------Ĉar la knabinoj ...

Sed antaŭ ol mi komprenis kiel,
lia tranĉilo min trafis jam.
Kaj ruĝ sango sur ĉujn ŝprucis,
eĉ al la falsa knabina mam'.
------Ĉar la knabinoj ...

Mi devis resti en hospitalo
monaton por resanigi min.
Kaj jen mi staris sen sip' kaj mono,
kaj edziniĝis jam la knabin'.
------Ĉar la knabinoj ...

Mi tial diras: "Marist' norvega,
de hispaninoj vin tenu for,
sed trovu hejme belamikinon,
fidelo floros en sia kor'."
------Ĉar la knabinoj de la hispanoj
------dancadas polkon sen bridi sin,
------ĉiam sub palmoj kaj sub kaŝtanoj,
------sed ili pretas perfidi vin.