Pensado terure la pensojn lacigas.
De nun mi limigan sistemon praktikas:
Mi pensos ĉi-jare, de l'dato unua,
nur de la tagmezo, ĝis horo dekdua.

---

Se l'fonto de ĉia malpaco kaj skismo
troviĝas en sukoj de l'hom-organismo,
la abstinenculoj sin sentu kontentaj,
ĉar akvo ni estas ĝis-naŭdek-procentaj.

---

Nuntempe krudeco kaj krimo ekscesas.
Nur unurilate moralo progresas:
Mi legas en krim-statistiko de l'ŝtato,
ke grave malkreskis - ĉevalo-ŝtelado.

---

Ne kredu; se iu cinike pretendas:
"Nenio, nenio malhoma min fremdas!"
Ĉar ofte, sub tia sentema ekspono,
ja povas frapeti korego de ŝtono.

---

Usona blankulo deklaris sen honto:
"Malŝatas mi du maljustaĵojn de l'mondo:
Diskriminacion pro rasa integro,
kaj devon dividi bufedon kun negro."

---

Mi diligente tra la vivo
memorindajn ideojn klasifikas.
Sed ĝuste kiam perfektas l'arkivo,
la kapablo ĝin uzi ekstrikas.

---